Ministri i Brendshëm, Sandër Lleshaj, ka pohuar se Policia e Shtetit ka informacione që mund të ketë tentativa për të shkaktuar probleme më 30 Qershor. Pavarësisht hedhjes së kësaj ‘shashke’, ai nga ana tjetër mohon që vendi mund të shkojë në një përplasje civile.
Në emisionin “Opinion”, Lleshaj u shpreh se mazhoranca është e detyruar nga Kushtetuta për të shkuar në zgjedhje.
Z. Lleshaj, ju pra jeni të vendosur për të shkuar në zgjedhje më 30 Qershor?
“Ne nuk jemi të vendosur, ne jemi të detyruar për të shkuar në zgjedhje, ne jemi të detyruar prej Kushtetutës. Kush mund të ishte alternativë…”
Po kush ju detyron ju z. Lleshaj të shkoni në një përplasje, që rrezikon të jetë edhe një përplasje civile?
“Jo, nuk rrezikon të ketë përplasje civile, sepse nuk ka një konflikt civil në Shqipëri”.
A keni ju informacione të klasifikuara si Ministri, si polici, nga shërbimet e specializuara që mund të ketë probleme më 30 Qershor?
“Probleme mund të ketë më datë 30 Qershor. Probleme të nivelit të rendit publik, probleme të kriminalitetit, por jo probleme të konfliktit civil”.
Keni informacione apo hamendje?
“Kemi dhe informacione që mund të ketë tentativa për të shkaktuar probleme në nivelin kriminal të çështjes, por jo në nivelin civil”.
Ç’do me thënë në nivelin kriminal të çështjes?
“Po grupe të caktuara kriminale, çdo ditë kemi probleme kriminale në Shqipëri. Grupe kriminale ose individë që zhvillojnë veprimtari kriminale ka shumë. Ata që dalin përballë ligjit janë kriminelë”.
