Ministri i Turizmit dhe Mjedisit, Blendi Klosi, mbetet optimist për një hapje të shpejtë të turizmit. Në një prononcim për ‘Euronews Albania’, ai ua bëri të qartë qytetarëve se pushimet sivjet nuk do jenë si ato që kemi shijuar vite më parë. Lidhur me shqetësimin e qytetarëve referuar stinës së verës dhe a do ketë plazh, ministri mbetet shpresëplotë se situata do të vijë drejt përmirësimit. Por gjithçka do bëhet duke plotësuar kushtet e higjienës, për të mos u bërë shkak i shtimit të numrit të të infektuave. Fundi i majit do të ketë shumë më tepër lehtësira sa i përket sektorit të turizmit.
“E vetmja gjë që dihet me siguri është se pushimet këtë vit nuk do të jenë si vitet e tjera, por do të jenë gjithsesi pushime. Vera do të shënojë rihapjen e gjithë jetës sociale të vendit dhe kjo do të shoqërohet me masa më të larta sa i përket higjienës dhe distancimit social. Por turizmi do të jetë injeksioni i parë që do të hyjë në ekonomi, edhe me para të ardhura nga jashtë, por edhe brenda.
Virusi po kontrollohet për momentin shumë më mirë se më përpara. Kemi lajme të mira për gjetjen e kurës dhe vaksinës, ndaj duhet të fillojmë të mendojmë se fundi i muajit maj do të ketë shumë më tepër lehtësira sa i përket sektorit të turizmit”, tha ministri.
Ministri e përjashtoi mundësinë që këtë vit të kemi plazhin klasik me grumbullime e festa, pasi kjo gjë, tha ai, është e pamenaxhueshme.
“Do kemi rregulla për hotelerinë, që nga ushqimi i ofruar në mënyrë individuale, jo në restorante, në bare në natyrë apo me distancë”, tha ai.
