Sekretari i Përgjithshëm i Partisë Demokratike dhe deputeti i zgjedhur, Gazment Bardhi deklaroi se ende nuk ka një vendim në lidhje me hyrjen në Kuvend, në legjislaturën e ardhshme. Deklarata e Bardhit u bë mbrëmjen e sotme, në një intervistë për Syri Tv.
Bardhi u shpreh se mandatet e fituara nga PD, janë mandate që përfaqësojnë vullnetin e pastër të lirë të qytetarëve.
Ai e cilësoi një masakër elektorale 25 prillin, teksa shtoi se PD është e vendosur për t’i shkuar deri në fund aspiratës së shqiptarëve për ndryshim.
Gazment Bardhi: ”Ajo që ka ndodhur më 25 prill, nuk është vullneti i shumicës së shqiptarëve sepse vullneti i tyre i treguar me votë ishte që në Shqipëri të ndodhte ndryshimi real. Për fat te keq ka ndodhur një masakër elektorale dhe kjo është arsyeja pse ne duhet të jemi të vendosur për t’i shkuar deri në fund aspiratës së shqiptarëve për ndryshim.
Aktualisht nuk ka një vendim për këtë cështje, pra për pjesëmarrjen në Kuvend. Kjo do të jetë një vendimmarrje e institucioneve të partisë dhe e grupimit parlamentar që do të vendosin raportin e tyre me parlamentin në shtator. E sigurtë është që ato mandate që ka PD janë mandate që përfaqësojnë vullnetin e pastër të lirë të qytetarëve, ndërsa mandatet që përfaqëson PS janë në pjesën dërrmuese të tyre ato që përfaqësojnë interesa okulte të botës së krimit, të oligarkëve apo të akteve madhore të korrupsionit të kryera në këto 8 vite në Shqipëri.”
