Popi Kola i cili është menaxheri i këngëtares Arilena Ara, në një lidhje skype për emisionin “Rreze Dielli”, tha se anulimi i Eurovisionit ishte thjesht një nga gjërat që duhej të ndodhte. Kjo për shkak të koronavirusit që ka mbërthyer botën.
“Fall from the sky” ishte një nga projektet më të rendësishme të Arilënës. Parë nga të gjitha opsionet, për një Eurovision pa publik apo për ta shtyrë atë, Eurovisioni do ishte gjëja e fundit që njerëzit do mendonin në këtë situatë kur koronavirusi po merr edhe jetë njerëzish. Nuk kishte mënyrë më të mirë. Në art nuk duhet të jesh gjysmak, por i plotë. Eurovizioni ose duhet të ishte tamam, ose mos të bëhej fare”, shprehet menaxheri i këngëtares.
I pyetur se nëse do kërkohej që edhe vitin tjetër të prezantoheshin me këngën e Arilena Arës, ai shprehet se nuk ka asgjë zyrtare. Ai ka shpjeguar më tej se ka një sërë procedurash që RTSH duhet të ndjekë, dhe është ende herët që të flitet për këtë gjë.
Po si e ka përjetuar këtë lajm këngëtarja? Menaxheri i saj tha se në fillim këtë informacion e kanë marrë nga mediat, e më pas në mënyrë zyrtare.
“E morëm vesh nga portalet dhe gazetarët, nderkohë që në anë zyrtare erdhi pak minuta më vonë. Nuk e kemi marrë si një lajm që çfarë ndodhi, duke patur parasysh situatën e krijuar, kur po numërohen edhe viktima. Eurovision ishte një nga gjërat që duhej anuluar”, përfundon Popi Kola.
