Në Kosovë është prodhuar makina e parë elektrike, e cila është projektuar nga gjashtë të rinj. Ata jetojnë në Gjakovë dhe kanë ndërmarrë këtë nismë të çuditshme me një qëllim. Ata thonë se janë të prekur nga përkeqësimi i niveleve të ndotjes në ambient, si pasojë e përdorimit të shpeshtë të makinave me lëndë djegëse.
“Kjo makinë nuk do ta ndotë ambientin dhe është shumë më ekonomike se makinat e tjera,” shprehen të rinjtë.
Ata janë vetëm 16 vjeç dhe janë pjesë e qendrës kreative “Bëje vetë”. Grupi i të rinjve që kanë punuar mbi projektin e ndërtimit të makinës elektrike thonë se procesi nuk ka qenë aspak i lehtë, dhe se fazat e prodhimit kanë pasur vështirësitë e tyre. Megjithatë të bashkuar dhe të vendosur për të prodhuar makinën elektrike ata ja kanë dalë ta përfundojnë me sukses punën e tyre.
Procesi i punës ka zgjatur 12 muaj. Makina elektrike ka 40 bateri, dhe me një rimbushje mund të përshkohen 70 kilometra.
