Ilir Alimehmeti është tërhequr nga balotazhi për primaret e PD-së. Belind Këlliçi do të kandidojë për PD-në në zgjedhjet e 14 majit përballë Erion Veliajt.
“Dje anëtarësia foli, foli në favor të kandidatit këtu pranë meje, z. Belind Këlliçi, djalë i shkëlqyer, bashkëshort i devotshëm. Iu kam dalë zot që sido që të shkonte do isha në krah të kandidatit që do të gëzonte votën e shumicës së anëtarësisë. Kjo është shenja e parë e qytetarisë. Falenderoj gjithkënd që më ka mbështetur”, tha Alimehmeti.
Belind Këlliçi është kandidati i Sali Berishës për Bashkinë e Tiranës përballë Erion Veliajt, në zgjedhjet lokale që do të mbahen më 14 maj. Gara e primareve shkoi në balotazh ndërmjet dy kandidatëve më të votuar, Belind Këlliçit, i cili mori 4040 vota dhe mjekut Ilir Alimehmetit, i cili mori 2196 vota, ndërsa në total votuan 8470 anëtarë dhe simpatizantë.
Mjeku Ilir Alimehmeti, në një dalje të përbashkët me Këlliçin, njoftoi se do të tërhiqet nga gara në balotazh. Ndërsa vlerësoi procesin e primareve si të rregullt, ai tha se anëtarësia foli në favor të Këlliçit.
