Eksperti i kriminalistikës, Ervin Karamuço, duke komentuar largimin nga detyra të Drejtorit të Përgjithshëm të Policisë së Shtetit, Gledis Nano, tha se në polici ka intriga dhe “brryla”. E sipas tij, Nano ishte viktimë e tyre. Ai dha një deklaratë të fortë duke cituar se struktura të caktuara të policisë punojnë me dy paga; nga njëra anë në shtet nga ana tjetër nga krimi. Teksa ka qenë i ftuar në “Log” në Abc, eksperti i kriminalistikës tha se Nano i ka kërkuar SPAK-ut hetimin e policëve që merrnin para nga krimi, por sot nuk dihet ende se çfarë është bërë me këto hetime. Po sipas tij, Shqipëria ka policë të certifikuar, por ka edhe shumë të tjerë që flenë me krimin e organizuar.
“Çështja e Gledis Nanos është çështje politike, jo teknike. Për deklaratën që ka dhënë në median franceze, e kam kritikuar drejtpërdrejtë, duke i thënë nuk e kishe ti të drejtën që të thoshe që është dekonspiruar operacioni. Struktura të caktuara të policisë punojnë me dy paga.
Nga njëra anë në shtet nga ana tjetër nga krimi. Në këtë studio unë kam folur me metaforë dhe thashë se mos do kontrollojnë nja dy banesa, që do të nxjerrin emrat e policëve. Para se të largohej Nano, ka çuar një shkresë në SPAK, ku janë përmendur disa nga gjërat, dhe ai ka kërkuar hetim për disa punonjës të Policisë së Shtetit që paguheshin nga krimi i organizuar.
Ajo shkresë është një “Kuti Pandore”, tregon se ai ka patur një dedikim shumë të madh në luftën kundër korrupsionit që nuk duhet ta bënte vetëm ai. Ne kemi 100 policë të certifikuar, por kemi shumë të tjerë që flenë me krimin e organizuar. Duhet të funksionojë Vettingu i vazhdueshëm i Policisë së Shtetit.
Tani vjen në krye të AMP-së dikush që të gjithë e dimë si është larguar, dosjen e parë që kërkoi ishte dosja e tij, por aty ai do të shohë se kush e ka hetuar.
Ushtria shqiptare është shumë më solide, kurse në Policinë e Shtetit ka shumë brryla, dhe ikja e Gledis Nanos është një nga këto arsye”, tha Karamuço.
