Gjatë mbledhjes së Komitetit Organizator, kryetari i Partisë së Lirisë Ilir Meta deklaroi se investimi më djallëzor i kryeministrit Rama ka qenë korruptimi i opozitës, si në rastet e bojkotimit të Reformës në Drejtësi dhe djegien e mandateve. Meta u shpreh optimist, duke vënë në dukje se përpos reagimit e protestave nga ana e opozitës, në pak muaj do kemi zgjedhjet vendore. Ai e cilësoi si një moment të rëndësishëm, pasi do vendoset pluralizmi politik dhe llogaridhënia.
“Investimi më i mençur, më i djallëzuar dhe më kriminal që ka bërë Rama ka qenë korruptimi i opozitës dhe përçarja e saj në të kaluarën. Kjo situatë është krijuar prej shumë vitesh. Që nga bojkoti i Reformës në Drejtësi e djegia e mandateve, e kështu me radhë. Jam optimist se situata do përmirësohet falë aksionit tonë të përbashkët. Përveç reagimit e protestave nga ana e opozitës, në pak muaj do kemi zgjedhjet vendore. Ky është një moment i rëndësishëm sepse do vendoset pluralizmi politik dhe llogaridhënia ku sot gjithçka kontrollohet nga një parti e vetme, dhe qytetarët janë lënë në mëshirën e arbitraritetit të kryetarëve monistë.
Partia e Lirisë ka një rol të rëndësishëm për këto zgjedhje, jo vetëm për të kontribuar në fitoren e opozitës, por edhe për të kthyer këshillat bashkiak për mbrojtjen e interesave të qytetarëve tanë. Besoj se kontributi juaj dhe i simpatizantëve të PL-së për të treguar forcën e ndëshkimit. Pa mëshirë, ashtu si është sjellë Rilindja me ne, dhe ne duhet ta ndëshkojmë pa mëshirë. Do t’i japim një mundësi PS-së të rikthehet, pasi të ndëshkojmë këtë sekt shkatërrimtar. PS nuk ekziston, por është një sekt. Ky sekt kërkon të vrasë vetbesimin e qytetarëve se ky është vendi i tyre dhe se ata janë Zot të fateve të tyre. Rilindja nuk lodhet së vjedhuri, pse do lodhemi ne së denoncuari?!”, u shpreh Meta.
