Në fjalën e marrë në Kuvend, deputetja e PD-së Grida Duma është ndalur tek kërkesa e pedagogëve për rritjen e pagës, e cila përvijoi edhe me protesta. Qeveria mori vendimin një ditë më parë për rritjen e pagës me 15%, por jo aq sa kërkojnë pedagogët, të cilët duan rritje me 50% të pagës. Sipas Dumës në vendin tonë pedagogët kanë pagat më të ulëta në rajon.
“Shqipëria e fundit për pagat e pedagogëve, edhe po të shkoj tek niveli i Kosovës nuk është pedagog, është ende një nëpunës mesatar që do të mbijetojë me atë pagë. Ka pedagogë që kanë përfunduar studimet jashtë vendit, i është dashur gjithë ato kohë që tu njihet doktoratura këtu. Ai zotëria që i referohem unë, ka punuar në ndërtim se kishte pasion filozofinë dhe erdhi këtu për të marr 650 mijë lekë të vjetra. I tha Ministria e Arsimit pas 6 vitesh që doktoratura jote vlen. Me jepni një universitet që ka marrëdhënie me kompanitë për tregun e punës. Pedagogu po kërkon pagën që mos të emigrojë”, tha Duma.
Pedagogët nga të gjitha universitetet në vend, zhvilluan dje një protestë pranë Universitetit Politeknik të Tiranës. Qëllimi i këtij tubimi ishin kushtet më të mira të punës, dhe rritja e pagave për punonjësit e universiteteve.
Kryeministri Edi Rama nuk u pajtua me kërkesën e pedagogëve për të rritur pagën 50%, duke ofruar vetëm 7% nga buxheti i shtetit. Sipas tij, universitetet kanë status autonom që qeveria nuk mund ta shkelë.
Nga ana tjetër, Ministrja e Arsimit dhe Sportit, Evis Kushi deklaroi dje për mediat se Këshilli i Ministrave vendosi rritje të pagës së pedagogëve, rektorëve dhe stafeve akademike me 15%, ku 7% do të mbulohen nga shpenzimet e qeverisë dhe pjesa tjetër do të mbulohet nga universitetet, në varësi të të ardhurave që ata grumbullojnë.
