Gjykata e Apelit ka shtyrë sërish seancën kundër deputetit të Partisë Demokratike, Ervin Salianjit, për dosjen “Babale”, seancë e cila sot duhet të mbahej në orën 14:00.
Në njoftimin e shpërndarë për mediat thuhet se seanca e sotme nuk do të zhvillohet për arsye se avokati mbrojtës i të akuzuarit tjetër për çështjen “Babale”, Jetmir Olldashi, ka depozituar pranë sekretarisë një raport mjekësor për paaftësi të përkohshme për punë.
Ndërkohë trupi gjykues nuk mund të formohet, për shkak të mungesës së njërit prej anëtarëve.
Salianji u shpall fajtor për veprën penale “kallëzim i rremë” në lidhje me çështjen “Babale”, dhe u dënua me një vit burg nga gjykata e Shkallës së Parë. Në Apel e ka çuar çështjen dhe gazetari Jetmir Olldashi, i cili u dënua me 6 muaj burg të konvertuar në 100 orë shërbim komuniteti. Nëse Apeli do të konfirmojë vendimin e Shkallës së Parë, atëherë deputeti Salianji rrezikon burgun.
