Një person i armatosur vrau 13 persona, duke përfshirë 7 fëmijë, dhe plagosi më shumë se 20 të tjerë në një shkollë në Rusi të hënën, përpara se të bënte vetëvrasje, thanë hetuesit.
Komiteti Hetues i Rusisë, i cili merret me krimet e mëdha, tha se po shqyrtonte lidhjet e dyshuara neo-naziste të sulmuesit. Ai quhej Artem Kazantsev, një burrë rreth të tridhjetave dhe se ai ishte i diplomuar në atë shkollë.
“Aktualisht hetuesit… po kryejnë një kontroll në banesën e tij dhe po studiojnë personalitetin e sulmuesit, pikëpamjet e tij dhe mjedisin përreth”, tha komiteti në një deklaratë. “Po bëhen kontrolle për aderimin e tij ndaj pikëpamjeve neofashiste dhe ideologjisë naziste”.
Hetuesit publikuan një video të shkurtër që tregon trupin e burrit të shtrirë në dyshemenë e një klase, me mobilje të përmbysura dhe letra të shpërndara në dyshemenë e njollosur me gjak. Komiteti tha se 6 viktimat e rritur përfshinin mësues dhe roje sigurie. Ai tha se 21 persona, përfshirë 14 fëmijë, u plagosën.
Agjencia e lajmeve Tass citoi hetuesit të kenë thënë se sulmuesi ishte i armatosur me dy pistoleta, dhe një furnizim të madh municionesh.
Zëdhënësi i Kremlinit, Dmitry Peskov, e përshkroi rastin si “një akt terrorist nga një person që me sa duket i përket një organizate apo grupi neofashist”.
Ai tha se mjekë, psikologë dhe neurokirurgë ishin dërguar me urdhër të Putinit në vendin e të shtënave në Izhevsk, rreth 970 km (600 milje) në lindje të Moskës.
Rusia ka parë disa të shtëna në shkolla vitet e fundit. Në maj 2021, një adoleshent i armatosur vrau 7 fëmijë dhe 2 të rritur në qytetin e Kazanit. Në prill të vitit 2022, një burrë i armatosur vrau 2 fëmijë dhe 1 mësuese në një kopsht fëmijësh në rajonin qendror të Ulyanovsk, përpara se të bënte vetëvrasje.
Burimi i lajmit: REUTERS. Përshtatur nga Tirana Today
