Gazetari dhe analisti Artur Zheji ka shprehur opinionin e tij se sulmet kibernetike tregojnë se jemi një vend në vijën e parë të luftës reale, edhe pse nuk duam ta pranojmë. I ftuar në rubrikën “Opinion” në “News24”, Zheji theksoi se me anë të këtyre sulmeve, vendit i zbulohen forcat ushtarake dhe bazat amerikane në vend, të dhëna të cilat më pas mund të blihen nga një palë e tretë që kërkon të nisë luftën në vend. Ai theksoi se jemi në vijën e afërt të luftës reale, dhe se ka një lidhje të fortë mes Iranit dhe Moskës.
“Ne jemi një vend në luftë, nuk duam ta pranojmë por jemi në luftë hibride. Është gjithmonë pararojë e një lufte tjetër, e një lufte tru për tru. Zbulohen informacione dhe krijohet destabilizim i vendit, zbulohen trupat, bazat, fuqia e zjarrit dhe ajrore dhe të gjitha këto krijojnë një hartë ushtarake në 3D të vendit, për llogari të një pale të tretë.
Ky që ka interes t’i blejë, ndoshta kërkon t’i blejë për një luftë pas luftës hibride. Jemi në vijën e afërt të luftës reale, nuk është teori konspirative. Është qetësia para furtunës, lufta është me boshtin lindor. Ka një lidhje të fortë mes Iranit dhe Moskës. Rusia dhe Irani kanë armik Perëndimin. Meqë Shqipëria është një hallkë strategjike, ose na konsiderojnë si hallka më e dobët që sulmohet më lehtë. Mendoj që porositësit janë ose në Teheran ose në Moskë”, tha Zheji.
