Mbrëmjen e së dielës u ekzekutua 19-vjeçari i identifikuar si Erjon Xhenje. I riu u qëllua me armë zjarri teksa ishte duke pirë kafe në një lokal pranë kryqëzimit të Kirasit, në zonën e njohur si “Rruga e Gjerë”. Autorët që po lëviznin me motoçikletë qëlluan me breshëri plumbash, duke e lënë të vdekur në vend. Trupi i viktimës u mor nga autoambulanca, pasi qëndroi për rreth 30 minuta në brendësi të lokalit. Rreth 500 metra larg vendit të ngjarjes, në lagjen “Guerile”, është gjetur duke u djegur motoçikleta së bashku pistoletën që dyshohet se i përket autorëve. Policia nuk ka dhënë ende një motiv për vrasjen, por mësohet se i riu, është kushëri me Sehar Xhenjën, një person me precedentë kriminal në Shkodër.
U vra për hakmarrje?
19-vjeçari Erjon Xhenje dyshohet se u vra për hakmarrje, megjithatë deri më tani nuk ka ende një autor të konfirmuar për vrasjen e 19-vjeçarit, i ekzekutuar mbrëmjen e së dielës në një lokal në Shkodër. Tashmë janë disa pista në të cilat policia po heton, përfshirë edhe një lidhje të mundshme me vrasjen e Ismet Çekores, 58-vjeçarit i ekzekutuar më 2 shtator në lagjen “Kiras”.
Ndonëse familja Xhenje rezulton e pa përfshirë në konflikte, babai i të riut mësohet të jetë shprehur se prej 1 jave po kërkonte shtëpi me qira për t’u larguar nga lagjja “Guerrile” ku jetonin, kjo për shkak se sipas tij, po bëhej problematike.
