“RTV Ora” dhe “Ora News” mbeten të sekuestruara duke shkaktuar dëme në miliona euro. Avokatët e presidentit të Yldon Media Group, Ylli Ndroqi kërkuan sot në Gjykatën Speciale shuarjen e masës së sekuestros për “RTV Ora” dhe “Ora News”, duke e bazuar kërkesën e tyre në faktin se ka kaluar afati dy vjeçar dhe nuk flitet më për ligjshmëri.
Avokati Enis Daci, përfaqëson interesat e znj. Mimoza Ndroqi në një arbitrazh kundër Republikës së Shqipërisë ku vlera e dëmit llogaritet në 130 mln euro.
“Sot që flasim, pretendimi financiar për dëmin e shkaktuar nga kjo procedurë, ndaj Mimoza Ndroqit është të paktën 130 milion euro. Po e përsëris edhe njëherë, 130 milion euro. Dua të theksoj se kjo shumë përmban një interes prej 5%, ç’ka nënkupton vetëm ky interes pa folur për principalin çdo mënyrë ekstraligjore dhe në cënim të drejtpërdrejtë dhe ulëritës të ligjit i kushton dhe do ti kushtojë taksapaguesëve shqiptarë një shumë prej të paktën 18 mijë eurosh në ditë.
Çdo ditë që shtyhet ky proces, taksapaguesit shqiptarë do të detyrohen të paguajnë 18 mijë euro në ditë për hir të mënyrës, metodave dhe instrumentalizimit të gjyqësorit shqiptar. Kur them instrumentalizim nënkuptoj: organin e akuzës dhe gjykatën në veçanti”.
Avokati ka dhe një thirrje për të mos ndërhyrë, por të lejojnë gjyqësorin të veprojë sipas ligjit. “Eshtë situatë kritike. I lutemi të gjithë njerëzve që janë prapa kuintave të mos ndërhyjnë, të mos instrumentalizojnë gjyqësorin. Ta lejojnë gjyqësorin të veprojë në bazë të ligjit”.
