Presidenti Joe Biden, ka thënë sërish se SHBA-të do të mbrojnë Tajvanin në rast të një sulmi nga Kina. I pyetur në një intervistë për CBS nëse trupat amerikane do të mbronin ishullin, Biden tha: “Po, nëse në fakt, do të kishte një sulm të paprecedentë”.
Vërejtjet e shtynë Shtëpinë e Bardhë të sqaronte se politika e SHBA-së nuk kishte ndryshuar.
Uashingtoni ka mbajtur prej kohësh një qëndrim “paqartësie strategjike” – ai nuk angazhohet për të mbrojtur Tajvanin, por gjithashtu nuk e përjashton opsionin.
Tajvani është një ishull i vetëqeverisur në brigjet e Kinës lindore, që Pekini e pretendon si pjesë të territorit të tij.
Uashingtoni ka ecur gjithmonë në një ‘litar të ngushtë’ diplomatik për këtë çështje. Nga njëra anë, ajo i përmbahet politikës së një Kine, një gur themeli i marrëdhënies së saj me Pekinin. Sipas kësaj politike, SHBA-ja pranon se ka vetëm një qeveri kineze dhe ka lidhje formale me Pekinin dhe jo me Tajvanin.
Por ajo mban gjithashtu marrëdhënie të ngushta me Tajvanin, dhe i shet armë sipas Aktit të Marrëdhënieve me Tajvanin, i cili thotë se SHBA-ja duhet t’i sigurojë ishullit mjetet për t’u mbrojtur.
Tajvani iu përgjigj vërejtjeve të zotit Biden të hënën duke përshëndetur “angazhimin e fortë të sigurisë së qeverisë amerikane ndaj Tajvanit”. Taipei tha se do të vazhdojë të thellojë “partneritetin e ngushtë të sigurisë” me Uashingtonin.
Vetëm në fillim të këtij muaji, SHBA-të ranë dakord t’i shesin Tajvanit 1.1 miliardë dollarë (955 milion £) në armë dhe mbrojtje nga raketat, duke provokuar zemërimin e Kinës. Pekini nuk i është përgjigjur ende komenteve të fundit të Biden, të transmetuara në një intervistë të CBS të dielën. Por Kina ka dënuar më parë komente të tilla nga zoti Biden, që premtonte veprime ushtarake të SHBA-së.
“Tajvani është një pjesë e patjetërsueshme e territorit të Kinës… Çështja e Tajvanit është thjesht një çështje e brendshme e Kinës që nuk shkakton asnjë ndërhyrje të huaj”, kishte thënë një zëdhënës i Ministrisë së Jashtme në maj.
Kjo ishte në përgjigje të komenteve të zotit Biden në Tokio në maj, kur ai tha “Po” kur u pyet nëse SHBA-të do të mbronte Tajvanin.
Edhe këtë herë Shtëpia e Bardhë lëshoi një deklaratë, duke nënvlerësuar komentet e presidentit: “Presidenti e ka thënë këtë më parë, përfshirë në Tokio në fillim të këtij viti. Ai gjithashtu e bëri të qartë atëherë se politika jonë në Tajvan nuk ka ndryshuar. Kjo mbetet e vërtetë”.
Është hera e tretë që nga tetori i vitit të kaluar, që Presidenti Biden ka shkuar më tej se qëndrimi zyrtar.
Por në intervistën të dielën, zoti Biden përsëriti se SHBA-ja nuk po inkurajonte pavarësinë e Tajvanit.
“Ekziston një politikë “Një Kinë” dhe Tajvani bën gjykimet e veta për pavarësinë e tyre. Ne nuk po lëvizim, nuk i inkurajojmë të jenë të pavarur – ky është vendimi i tyre”, tha ai.
Tensionet mes SHBA-së dhe Kinës janë rritur, pasi Kryetarja e Dhomës së Përfaqësuesve të SHBA-së, Nancy Pelosi bëri një vizitë të diskutueshme në ishull në gusht – një udhëtim që zoti Biden e kishte thënë se “nuk ishte një ide e mirë”.
Pekini u përgjigj me një bllokadë ushtarake pesë-ditore rreth Tajvanit. SHBA-ja pretendon se Kina gjuajti raketa mbi ishull, por Pekini nuk e konfirmoi këtë. Tajvani tha se raketat e lëshuara nga Kina fluturuan lart në atmosferë dhe nuk përbënin asnjë kërcënim.
Burimi i lajmit: BBC. Përshtatur nga Tirana Today
