Shqipëria është përfshirë nga reshjet e shiut. Situata më e rënduar për momentin paraqitet në Tropojë, aty ku kryetari i Bashkisë ka njoftuar se dëmet janë të mëdha si pasojë e shiut të pandërprerë prej dy ditësh.
Emergjencat Civile njoftojnë se situata më e rëndë është në njësinë Administrative Bytyç dhe Mergegaj, pasi ka përmbytje të jashtëzakonshme. “Nga informacioni i marrë nga Përgjegjësi i EC-së Bashkisë Tropojë, si rezultat i reshjeve te shiut: gjendja ne fshatin Fushe-Lumi te Nj. Adm. Margegaj dhe në fshatin Vlad të Nj. Adm. Bytyç ka përmbytje te jashtëzakonshme”.
Situata më e përkeqësuar është në fshatin Vlad, ku stafi i Bashkisë po monitoron situatën për të parandaluar ndonjë fatkeqësi. Në fshatin Fushë Lumi janë bllokuar 7 familje, si pasojë e sasisë së madhe të reshjeve dhe ujit të grumbulluar.
“Në fshatin Vlad situata është më e përkeqësuar, aty që në orët e para të mëngjesit ndodhen stafi i Bashkisë Tropojë, ku po monitorojnë situatën për të parandaluar ndonjë fatkeqësi. Ne fshatin Fushë-Lumi, 7 familje janë të bllokuara nga sasia e madhe e reshjeve dhe uji i grumbulluar”, thuhet në njoftimin e Emergjencave Civile.
Për shkak të motit të keq, është dëmtuar linja e rrjetit të tensionit të mesëm në Fierzë.
“Rrjeti tensioni mesëm #Fierzë
Moti i keq, me reshje dëmtoi linjën, brigadat e #OSSH #Kukës #Tropojë në terren për riparimin e avarisë”.
