Ngjarja në Kosovë ku një e mitur është përdhunuar, ka marrë një tjetër pikë kthese. 11-vjeçarja u përdhunua fillimisht nga 5 persona për 7 orë.
Por pas hetimeve, autoritetet kosovare kanë dalë në përfundimin se e mitura ishte përdhunuar nga 11 persona. Këta shtetas janë në qeli dhe po hetohen për akuzën e rëndë të përdhunimit. Avokati Besnik Berisha, ka dhënë një detaj tronditës. Teksa ka qenë i ftuar në “Shqipëria Live”, ai tha se e mitura ishte përdhunuar nga më shumë se 11 persona, dhe se pak kohë më parë kishte rënë viktimë e trafikimit të qenieve njerëzore me qëllim prostitucionin e saj.
“Absolutisht që bëhet fjalë për më shumë se 11 persona. Nuk dua të terrorizoj të tjerët kur dëgjohen shifra dhe keqpërdorim i tyre. Vajza i është nënshtruar me djenin e saj, sepse aq ka djeni ajo dhe aq di lidhur me këtë çështje. Vajza dyshohet se është keqpërdorur seksualisht nga më shumë se 11 persona qe janë pas hekurave”, është shprehur avokati Besnik Berisha.
Nuk kanë qenë të pakta reagimet në Kosovë për këtë ngjarje të rëndë. Presidentja Vjosa Osmani në një reagim në rrjetet sociale e vlerësoi ngjarjen si “akt tronditës e çnjerëzor”, ndërsa kërkoi “një hetim rigoroz dhe përgjegjësi para ligjit për kryesit e veprës”. Sakaq, kryeministri i Kosovës Albin Kurti kërkoi dënim për përdhunuesit e vajzës vetëm 11-vjeç.
