Dje në Kosovë, qindra qytetarë u mblodhën për të kërkuar drejtësi për 11-vjeçaren e përdhunuar nga 5 persona. Me pankarta në duar “Mbrojtje për vajzat dhe gratë” marshuan nëpër rrugët e kryeqytetit, për të sensibilizuar institucionet dhe shoqërinë për parandalimin e rasteve të tilla. Edhe në Tiranë u përcollën mesazhe të shumta për sensibilizim. Të veshur me bluza të bardha, ku shkruhej “Unë bërtita jooo”, dhe me pankarta në duar, vajza dhe djem kërkuan drejtësi për 11-vjeçaren në Kosovë. Qytetarët ishin kujdesur që të bënin pankarta, dhe të jepnin mesazhe nga më të ndryshmet për t’i dhënë fund dhunës seksuale ndaj të miturve. Ngjarja e rëndë ka ndodhur disa ditë më parë në Kosovë, ku një e mitur vetëm 11-vjeçare u përdhunua për rreth 7 orë nga 5 persona.
Prokuroria jep informacione shtesë për viktimën, ishte raportuar e zhdukur edhe në qershor
Në qershor të këtij viti, e mitura fillimisht është raportuar në stacionin policor në Prishtinë si person i zhdukur. Me këët rast është njoftuar prokurori kujdestar nga Departamenti për të Mitur i kësaj prokurorie, i cili ka autorizuar policinë në ndërmarrjen e të gjitha veprimeve të nevojshme hetimore.
“Po ashtu, për hir të informimit të saktë, ju njoftojmë se në qershor të këtij viti, e mitura fillimisht është raportuar në stacionin policor në Prishtinë si person i zhdukur, me ç’ rast është njoftuar prokurori kujdestar nga Departamenti për të Mitur i kësaj prokurorie, i cili ka autorizuar policinë në ndërmarrjen e të gjitha veprimeve të nevojshme hetimore dhe e njëjta është gjetur e intervistuar në prezencë të punëtores sociale dhe mbrojtësit të viktimave, si dhe, më pas është dërguar në strehimore”, thuhet në njoftim.
Më tej bëhet e ditur se në mënyrë urgjente, prokurori kujdestar ka ndërmarrë veprime konkrete hetimore, me qëllim të sqarimit të plotë të rastit në fjalë.
“I njëjti ka lëshuar urdhëresa për ekzaminime dhe vlerësime të ndryshme. Po ashtu, në prezencë të psikologes, Qendrës për Punë Sociale dhe mbrojtësit të viktimave e mitura është marrë në pyetje nga Prokurori i Shtetit dhe ndaj të njëjtit rast janë duke vazhduar hetimet.
Të dy çështjet penale ndodhen në procese hetimore të ndara dhe i takojnë Procedurës për të Mitur, andaj, kufizimi i dhënies së informatave do të bëhet me qëllim të ruajtjes së integritetit të hetimeve dhe do të shmanget çdo publicitet i tepruar dhe informata që shpien në identifikimin e të miturve, pasi shkelin rëndë të drejtat e fëmijëve për privatësi dhe janë në kundërshtim me Kushtetutën, Ligjet dhe Konventat Ndërkombëtare për mbrojtjen e fëmijëve”, thuhet në njoftim.
Në fund, Prokuroria Themelore njofton se të gjitha procedurat ku janë të përfshirë të miturit janë procedura konfidenciale dhe fshehtësia e informacionit lidhur me fëmijën viktimë apo dëshmitarë mbrohet me ligj, e po ashtu, secili informacion që priret të bëjë identifikimin e fëmijës si dëshmitar apo viktimë, nuk botohet pa lejen e shprehur qartë të gjykatës.
