Një konflikt i çastit i mori jetën 33-vjeçarit Madrit Ulqinaku, mbrëmjen e 17 gushtit në Elbasan. Kjo është tragjedia e dytë në familjen Ulqinaku, pasi në vitin 1997 është vrarë edhe vëllai i Madritit. Mbrëmjen e djeshme, ngjarja e rëndë ndodhi pranë një zone të banuar, në afërsi të stadiumit “Elbasan Arena”. Policia ka identifikuar autorin e dyshuar si K.Sh, 20 vjeç.
Pas një përplasje verbale mes viktimës dhe një grupi të rinjsh, 20-vjeçari nxori armën dhe qëlloi disa herë mbi Ulqinakun, duke e lënë të vdekur.
Mësohet se 33-vjeçari ishte baba i një fëmije. Pas ngjarjes, autori dhe personat e tjerë u larguan menjëherë nga vendi i ngjarjes, ndërkohë që policia blindoi zonën.
Policia ka sekuestruar kamerat në zonë, të cilat ndihmuan edhe në identifikimin e autorit, tashmë i shpallur në kërkim. Autoritetet kanë ngritur pika kontrolli në hyrje dhe dalje të Elbasanit, për të bërë të mundur kapjen e tij.
