Bajram Begaj, ka zgjedhur Kosovën si vendin e parë të cilin viziton si President i vendit tonë. Begaj është pritur në një ceremoni zyrtare nga homologia e tij, Vjosa Osmani, nga e cila erdhi edhe ftesa, për të vijuar me takime të nivelit të lartë edhe gjatë ditës së nesërme.
Begaj do të ketë takime edhe me kryeministrin e Kosovës Albin Kurti, si dhe me kryeparlamentarin Glauk Konjufca. Në ditën e parë të vizitës, Begaj do të zhvillojë homazhe tek varri i Presidentit Rugova, vizitë në shtëpinë muze të familjes Jashari si dhe nderime para memorialit të personave të zhdukur.
Në ditën e dytë të vizitës, do të zhvillohen në ambientet e Kuvendit të Republikës së Kosovës takime me përfaqësues të partive politike, kreun e AAK-së Ramush Haradinaj, kryetarin e LDK-së Lumir Abdixhiku, dhe atë të PDK-së, Memli Krasniqi.
Kreu i shtetit shqiptar do të zhvillojë takime edhe me partitë minoritare, komandantin e KFOR-it, dhe trupat e Forcave të Armatosura Shqiptare, që shërbejnë në KFOR (Pejë).
Vizita e parë zyrtare jashtë vendit, do të mbyllet me një takim me kryetarin e komunës së Prizrenit, dhe vizitën në Kompleksin e Lidhjes së Prizrenit.
