Në një takim me të rinjtë, lideri i “Partisë së Lirisë” Ilir Meta, ka paralajmëruar se tashmë është koha për tu hedhur në veprim. Në mënyrë simbolike, ai e ka nisur fjalën duke thënë: “Koha për të përveshur mëngët”.
Ai tha se vendi ynë është në drejtim të gabuar, por “Partia e Lirisë” do të sjellë shpresën e munguar. Meta nuk e ka lënë me kaq, por është ndalur tek një sërë problematikash, duke thënë se “Partia e Lirisë” është kundër shpopullimit.
“Pas vendimit historik për krijimin e “Partinë e Lirisë”, kisha kënaqësinë dhe kam kënaqësinë që një nga takimet e para ta zhvilloj me ju, si përfaqësues të studentëve dhe gjimnazistëve të qytetit. Shqipëria është në një drejtim të gabuar dhe shumë të gabuar, por nuk do të jetë më kështu. Prandaj e kemi sot edhe “Partinë e Lirisë” si parti të shpresës, të rinisë, si një parti kundër shpopullimit, dramës jo vetëm më të madhe që po përjeton çdo familje shqiptare, por njëkohësisht dhe kundër armikut më të madh të së ardhmes së Shqipërisë dhe interesave kombëtare. Që Shqipëria është në drejtimin e gabuar, nuk është një retorikë dashakeqe, është një e vërtetë thellësisht shqetësuese dhe ulëritëse që e tregojnë të gjitha faktet”, tha Meta.
