Lëvizja Socialiste për Integrim do të mbajë emrin “Partia e Lirisë”. Kjo forcë politike do të drejtohet nga një Komitet Organizator, me në krye Ilir Metën, derisa sipas statutit të zhvillohen zgjedhjet që ta ngjisin zyrtarisht ish Presidentin në krye të saj.
Analisti Mentor Nazarko e ka cilësuar ndryshimin e emrit, si një ndryshim fiziologjik për partinë dhe si një shkëputje nga e kaluara politike. Nazarko është i mendimit se ish-presidenti Ilir Meta po përpiqet të afirmohet nga publiku si një lloj lideri i ri i opozitës.
“Meta po afirmohet si lloj lideri i ri i opozitës. Ndryshimi i emrit është një shkëputje pas 18 vjetësh, është shndërrim fiziologjik.
Ai do të ndërlidhet me brezin e ri. Vjen në karrierë pas një virgjërimi institucional, politik. Emërtimi i partisë nga LSI në LRI ngjan me “shtëpinë e lirisë” së Berluskonit. Ngjan me modelin italian. Meta u përpoq të tregonte se kishte koherencë me shumë qëndrime që ka mbajtur si President.
Gjithë fjalimi i tij ishte i kujdesshëm, kishte narrativa me kalim interesant. Një nga fjalimet më të mira që kam parë te ai. Shikueshmëria e Metës gjatë fjalimit ishte më e lartë se Berisha në dy daljet e fundit. Meta do të theksojë dimensionin shtet formues”, u shpreh Nazarko gjatë intervistës së tij në studion e emisionit “Log”.
Ishte ish-themeluesi i LSI-së, Ilir Meta, i cili bëri publik emrin e ri të forcës politike që do të quhet “Partia e Lirisë”.
Partia e re, do të drejtohet nga Ilir Meta deri në zgjedhjet që do të zhvillohen pas dy muajsh. Më herët kryetarja e LSI-së, Monika Kryemadhi, ka depozituar dorëheqjen si kryetare e LSI-së, për t’i hapur rrugë ndryshimit të emrit të partisë.
