Greqia i është bashkuar Portugalisë dhe Spanjës, në refuzimin e propozimit të Komisionit Evropian për të ulur konsumin e gazit me 15% në 27 vendet anëtare.
Masa synon të sigurojë që blloku të ketë rezerva të mjaftueshme për të përballuar dimrin, në një kohë kur furnizimi me gaz nëpërmjet Nord Stream mbetet i pamjaftueshëm.
Qëndrimi i Greqisë vjen pasi Portugalia dhe Spanja refuzuan propozimin e Brukselit. Sekretari i Shtetit për Mjedisin dhe Energjinë, tha në një deklaratë për “Expresso” se Portugalia është “plotësisht kundër” propozimit, duke argumentuar se shkurtimi, midis gushtit 2022 dhe marsit 2023, “ishte i paqëndrueshëm” sepse e detyroi vendin të ketë “jo elektricitet”.
Në Spanjë, nënpresidentja spanjolle dhe ministrja e Tranzicionit Ekologjik, Teresa Ribera kundërshtoi masën duke thënë se “nuk mund të na kërkohet të bëjmë një sakrificë, për të cilën as nuk na është kërkuar mendim”, duke garantuar se në vend nuk ka ndërprerje “as energji elektrike, as gaz” për familjet apo industrinë.
Ndërkohë, “Qeveria greke nuk është dakord me parimin e propozimit Europian, i cili synon uljen e konsumit të gazit me 15%. Ne kemi paraqitur një sërë propozimesh në lidhje me çmimet dhe furnizimin me gaz dhe do të insistojmë në mbështetjen e tyre si një zgjidhje evropiane”, tha zëdhënësi i qeverisë greke, Giannis Oikonomou për “Reuters”.
Greqia është 40% e varur nga gazi rus dhe, ndryshe nga vendet e tjera, nuk ka parë ende asnjë ndërprerje në furnizim. Megjithatë, për të reduktuar varësinë, Athina ka zëvendësuar pjesën më të madhe të karburantit rus me gaz të lëngshëm (LNG) të importuar nga Shtetet e Bashkuara dhe vende të tjera.
Burimi i lajmit: The Portugal News. Përshtatur nga Tirana Today
