Deputeti Erion Braçe, si rrallë herë ka komentuar mbi raportin që ka me kryeministrin Rama, për të cilin tha se përplasjet vijnë për shkak të punës, por ata e gjejnë gjithmonë gjuhën e përbashkët. Ai ka ndarë me publikun të pathënat, duke sjellë në fokus edhe debatet e herëpashershme, të cilat vijnë si pasojë e punës. Teksa ishte i ftuar këtë të premte në “Më lër të flas”, Braçe tha se i ka marrëdhëniet shumë të mira me kryeministrin, ku një muaj flasin e dy muaj nuk flasin. Mbi këtë marrëdhënie ai tha se kanë arritur të zgjidhin shumë punë, prandaj është një mënyrë se si ata kanë zgjedhur të komunikojnë.
Romeo Veshaj: Më trego pak për fëmijërinë tënde, unë e di që je një djalë Kombinati…
Erion Braçe: Unë dhe Manushi jemi nga Kombinati, Manushi para meje, unë pas Manushit.
Romeo Veshaj: Nuk ia thotë dot emrin, Edi Manushi.
Erion Braçe: Ne për Manush e njohim, po të jetë për Edi kemi një tjetër. Edi vetëm një ka.
Romeo Veshaj: Meqë ra fjala, si i ke marrëdhëniet me kryeministrin?
Erion Braçe: Shumë të mira i kam. Një muaj flasim, dy muaj nuk flasim. Pastaj muajin e tretë zihemi prapë, e nuk flasim për katër muaj. Është një mënyrë komunikimi mbi bazë të së cilës bëhen disa punë.
Romeo Veshaj: Mua më dukeni si një çift toksik.
Erion Braçe: Mundet, por çmimi i lëndëve toksike që përdoren për bujqësi është rritur shumë.
