Rreth 10 persona janë marrë në pyetje nga policia e Sarandës gjatë natës, për shpërthimin në hotelin në pronësi të Mariel Muratit, drejtorit të FSDKSH Sarandë, por ende nuk ka asnjë të dyshuar për ngjarjen. Ndërkaq, burime pranë grupit hetimor bëjnë me dije për “Panorama” se kamerat e hotelit kanë qenë jashtë funksionit në momentin e ngjarjes, duke vështirësuar kështu punën e policisë. Blutë kanë sekuestruar kamerat e bizneseve dhe banesave përreth vendit të ngjarjes.
Autorët donin të paralajmëronin pronarin
Burimet bëjnë me dije se autorët nuk kanë pasur qëllim shkatërrimin e hotelit, por paralajmërimin e pronarit ose prishjen e imazhit të tij pasi sasia e eksplozivit të vendosur ishte rreth 50 gram, ndërsa vendi ishte tek garazhi i tij, duke mos shkaktuar dëme të mëdha materiale edhe pse zhurma e shpërthimit u dëgjua fuqishëm në gjithë qytetin. Dyshohet se autori ose porositësi të jenë persona të njëjtë që janë përfshirë dhe në ngjarjen e një viti më parë, kur në të njëjtin hotel u vendos eksploziv.
Në dëshminë për grupin hetimor, ai ka thënë se nuk ka konflikte me askënd. Mësohet se Murati ka thënë që gjithçka është bërë për t’i prishur imazhin. Lënda plasëse ishte vendosur në garazhin e hotelit “Yacht Premium Hotel”, i cili është në pronësi të Mariel Muratit, ish-Drejtor i ALUIZNI-t Sarandë dhe aktualisht Drejtor i FSDKSH (Fondi i Sigurimit të Detyrueshëm të Kujdesit Shëndetësor) në Sarandë.
