Gazetari investigativ, Artan Hoxha, i ftuar në “Abc Live”, ka zbuluar të tjera detaje në lidhje me të riun që i bënë atentat me eksploziv më 11 qershor. Ai tha se Aleksandër Sadikaj kishte një tjetër biznes në Tiranë, përveç resortit në Memaliaj.
Gazetari zbuloi se viktima kishte një lokal në zonën pranë rrugës “Irfan Tomini”. Ai një ditë para ngjarjes ka qenë pikërisht në atë zonë, ku dyshohet se i është vendosur edhe sasia e eksplozivit.
Mes të tjerash, gazetari Hoxha u shpreh se autorët kanë qenë profesionistë dhe e kanë ditur sasinë e saktë të tritolit, sa për ta eliminuar Aleksandër Sadikajn. Pasi i ka shpërthyer mjeti, Aleksandër Sadikaj ka dalë nga makina vetë, e ndërsa në spital ka mbërritur vonë.
“Kishte dalë nga makina vetë. Ndihma e parë është dhënë nga persona të tjerë. Ai në spital ka arritur vonë. Mbase edhe mund të mbijetonte. Pamjet ishin shumë të frikshme. Pamje shumë të rënda”.
“Nuk ishte e lehtë t’i afroheshe atij. Ata kanë gjetur garanci për të realizuar 100% këtë punë me eksploziv. Kanë vendosur një sasi eksplozivi me një minë të tillë, për të siguruar se ai nuk do mbijetonte”, u shpreh Artan Hoxha.
“Autorët kanë pasur burime financiare të mëdha, dhe burime njerëzore të mëdha. Kanë qenë shumë të motivuar”, përfundoi ai.
