Pas deklaratës së Enkelejd Alibeajt se deputetët se PD-së nuk do të marrin pjesë në procesin e votimit për Presidentin, një kundërpërgjigje ka ardhur nga kreu i grupit parlamentar të PS-së, Taulant Balla.
Ai e konsideron këtë akt një bojkot, dhe thotë se nuk sjell kurrë ndonjë përfitim, por është fyerje dhe shpërfillje e delegimit të sovranitetit të zgjedhësve. Alibeaj tha për mediat se detyrimet morale dhe politike ndaj qytetarëve ata i përmbushën duke u bërë pjesë e procesit. Por për ta, nuk bën sens që nesër të jenë prezent në raundin e katërt. Në të kundërt, shtoi Alibeaj, do të ishte si të legjitimohet “kapja e mazhorancës nga ana e Edi Ramës”.
“PD i rikthehet bojkotit të Kuvendit?! “Të kërkosh suksesin nuk do të thotë të mos bësh gabime, por të mos bësh të njëjtin gabim për herë të dytë”, apo të tretë, – pat thënë George Bernard Shaw. Bojkoti nuk sjell kurrë ndonjë përfitim, ai është thjeshtë fyerje dhe shpërfillje e delegimit të sovranitetit të zgjedhësve”.
