Mbrëmjen e djeshme, një ngjarje e rëndë tronditi kryeqytetin. Komisariati nr.3 në Tiranë u kthye në skenë krimi, pasi një efektiv qëlloi kolegun me armën e shërbimit, duke i marrë jetën.
Ngjarja ndodhi rreth orës 21 e 20 minuta, kur efektivët po përgatiteshin të kryenin instruktazhin. Mes dy efektivëve të patrullës Ludian Zaimi, 25 vjeç dhe Çaush Saliasit 55 vjeç, ka nisur një debat për motive banale. Duke mos suportuar fjalët, Zaimi ka nxjerrë armën e shërbimit dhe ka qëlluar gjashtë herë në drejtim të kolegut të tij më të vjetër.
55-vjeçari është dërguar me urgjencë në spital, por për shkak të plagëve të marra, nuk ka mundur të mbijetojë. Autori është ndaluar nga kolegët e tjerë.
Autori në dëshminë e tij ka thënë se viktima e ka ngacmuar me fjalë, dhe të gjitha këto i kishte akumuluar.
“Para se të merrnim shërbimin, ndodheshim në zyrën e ndarjes së turneve. Kam qenë tejet i mbyllur, më ka ngacmuar me fjalë dhe disa herë ofenduese. I kisha akumuluar të gjitha këto deri në mbrëmjen e sotme”, ka thënë ai.
Autori kishte vetëm një vit e gjysmë që ishte bërë pjesë e uniformave blu, ndërsa viktima ishte prej 20 vitesh polic.
