Kryeministri Rama pohoi ditë më parë se Shqipëria do të legalizojë kultivimin e kanabisit për përdorim mjekësor. Kjo deklaratë erdhi pas publikimit të rezultateve të Këshillimit Kombëtar, që tregoi se 61 për qind e shqiptarëve të pyetur janë shprehur pro legalizimit të kanabisit për përdorim mjekësor. Në bazë të të dhënave të sondazhit të nisur nga data 19 janar-31 mars, rreth 309 mijë nga mbi 500 mijë shqiptarë i janë përgjigjur pro pyetjes së shtruar nga qeveria: nëse duhet lejuar kultivimi, përpunimi dhe eksportimi i kontrolluar nga shteti i kanabisit për qëllime mjekësore.
Sakaq, Ministri i Brendshëm, Bledi Çuçi ka treguar vendimet që janë marrë në mbledhjen e përjavshme të qeverisë. E para kishte të bënte me miratimin e reduktimit të zyrave të Gjendjes Civile, e paralajmëruar kjo edhe nga kryeministri Edi Rama. Nga 1 maji, shumica e shërbimeve në zyrën e Gjendjes Civile do të ofrohen online. Po kështu ministri foli edhe për kultivimin e kanabisit për qëllime mjekësore.
Ai tha se do të ketë monitorim strikt për këtë proces, në mënyrë që të mos ketë abuzime. “Nuk ka lidhje kultivimi i kanabisit me kultivimin e jashtëligjshëm të kanabisit me qëllime të tjera. Këtë gjë do e bëjmë me një ligj të posaçëm, që do të përcaktojë rregulla strikte për vendet ku do të mbillet si dhe për bashkëpunimin me vende të tjera të njohura që janë dhe operojnë në këtë fushë.
Disiplinimi me ligj do të jetë strikt. Takimet me drejtuesit e qarqeve janë rutinore. Kësaj radhe ishte për të monitoruar sa më mirë territorin e Shqipërisë, që fenomeni të jetë në zhdukje. Është momenti kur fillojnë edhe mbjelljet e kanabisit.
Ky vit do të shënojë progres të madh në frenimin e këtij fenomeni. Ju e dini që thuajse 90 % e vendeve të OCD e kanë legalizuar. Nuk ka nevojë për studim të thelluar, kur pothuajse të gjithë vendet e standardit Evropian e kanë të legalizuar këtë. Është dhe përpunimi aspekt i rëndësishëm i kësaj. Kur të përgatisim legjislacionin për këtë temë, duhet të përgatitemi që të mos bëjmë gabimet e fqinjëve tanë”, përfundoi ministri.
