Kryeministri Edi Rama ka publikuar mëngjesin e sotëm në rrjetet sociale 7 masat e Paketës së Rezistencës Sociale. Qytetarët kanë dalë për ditë me radhë në protestë kundër rritjes së çmimeve, teksa vetëm dy ditë më parë kreu i qeverisë prezantoi planin me 7 pika Paketën e Rezistëncës Sociale kundër pasojave ekonomike që do të sjellë lufta. Kjo paketë, për kryeministrin, është tregues që qeveria nuk i braktis qytetarët që kanë nevojë në ditë të vështira.
“MIRËMËNGJES
dhe me 7 masat e Paketës së Rezistencës Sociale, të cilat flasin vetë, edhe këtë herë, se kjo është qeveria që kurrë nuk i lë vetëm në ditët e vështira ata që kanë nevojë për mbrojtje, ju uroj një javë me më pak stres nga pasojat e padëshiruara të një lufte që as e nisëm, as e ndalim dot ne, por që do ta përballojmë patjetër me forcën e karakterit dhe të solidaritetit tonë me njëri-tjetrin”, shkruan Rama.
Kryeministri Edi Rama premtoi dje në një takim me dy biznese se çmimi për transportin urban nuk do të rritet, dhe se gjysmë milionë qytetarë do të marrin 30 mijë lekë të vjetra bonus nga qeveria për të përballuar krizën e rritjes së çmimeve. Ai përsëriti se qeveria e tij do të mbrojë qytetarët shqiptarë, që ndodhen në vështirësi ekonomike.
