Grabitësit kishin pikasur një bankë të nivelit të dytë, pranë Ministrisë së Drejtësisë, për ta grabitur. Por mënyra që zgjodhën për të hyrë brenda saj, ishte si nëpër filma.
Grabitësit për të hyrë brenda ambienteve të bankës që do të vidhnin, kanë përdorur tunelet dhe kanalet nëntokësore të bulevardit të ri “Zogu I”. Autorët ishin veshur me jelekët të punonjësve të mirëmbajtjes, në mënyrë që të kamufloheshin për të lehtësuar punën e tyre për të hyrë në kanalet e ujërave të zeza. Mësohet se distanca nga tuneli ku hynë grabitësit te banka e nivelit të dytë është 300 metër.
Tashmë janë publikuar edhe fotot e para nga brendësia e tunelit të nëndheshëm që u gërmua nga disa persona të paidentifikuar, me qëllim grabitjen e bankës në kryeqytet.
Policia vijon hetimet lidhur me këtë ngjarje, e cila duket si në filmat aksion, teksa personat ende nuk janë identifikuar.
Për fatin e keq të tyre, i gjithë skenari nuk shkoi si ishte parashikuar, pasi ata u pikasën nga Forcat Shqiponja që ishin në zonë.
Dyshohet se grabitësit kanë pasur hartën e tunelit dhe dinin ekzaktësisht se si mund të shkonin duke gërmuar brenda ambienteve të bankës. Hetimet janë shtrirë në disa drejtime, pasi ata mund të jenë ndihmuar nga punonjës të mirëmbajtjes së tuneleve nëntokësore apo elektriçistë, të cilët kanë pasur planimetrinë e zonës dhe ua kanë dhënë atë grabitësve. Hetuesit, në tunel po marrin provat biologjike.
