Në kohën kur Sali Berisha mbante një fjalim për gazetarët, kreu i PD-së Lulzim Basha ka zbritur vetëm pak metra pas tij për të hyrë në seancën e Kuvendit. Duke marrë shkas nga kjo situatë e sikletshme, Berisha nuk i ka kursyer ironitë ku tha se “Armiku më i rrezikshëm është ai që të rri pas shpine”.
Sakaq, në Kuvend, Berisha ka replikuar me ministrin e Drejtësisë, Ulsi Manja, për të cilin tha se ka bërë kompromis me kryeministrin Rama.
Berisha u shpreh se ministri i Drejtësisë po mban të fshehtë Vettingun e disa gjyqtarëve dhe prokurorëve, të cilët i përmendi edhe me emra.
Në kohën që ish-kryeministri Berisha kishte një thirrje për dibranët dhe gjithë shqiptarët, kryetarja e Kuvendit, Lindita Nikolla i hoqi fjalën. Ndërsa ministri Manja si përgjigje i tha se nuk pranon të replikojë me një zë që i duket sikur i vjen nga bota e përtejme.
Berisha: Ne emër tuaj le ti shtrojmë një pyetje ministrit që sapo foli pse fshihet, pse mbahet sekret Vettingu i Sokol Sadushit, Vettingu i Ervin Popës, i Ilir Pandës, mbi çfarë ligji dhe bazë? Përveç shpellave të mafias.
Së dyti, cili është roli yt, thuaja këtu deputetëve dhe shqiptarëve në denatyralizimin e Dibrës me HEC e Skavicës. A ndjen ti si dibran përgjegjësi për shuarjen nga dheu të tokave pjellore të Dibrës.
Çfarë kompromis ke berë me Ramën? U bëj thirrje dibraneve, në Dibër, Shqipëri e diasporë të ngrihen fuqishëm për mbrojtën…
Nikolla: Kjo nuk është procedurë, po të ndërpres fjalën.
Manja: Doktor në fakt kur flet ti dhe kërkon llogari edhe për Dibrën, mua më duket si një zë i vjetër që vjen nga bota e përtejme. Me botën e përtejme jam gjeneratë tjetër dhe nuk replikoj.
Dibranët janë në hallin e tyre dhe në datën 6 mars do të flasin vetë dibranët, nuk ka nevojë ti bëjë thirrje askush nga kjo sallë. Le të zgjedhin më të mirë.
