Presidenti Meta njofton se është ankuar zyrtarisht në Shtëpinë e Bardhë për ambasadoren e SHBA-së, Yuri Kim. Diplomatja amerikane ka qenë në fokus të akuzave të Kreut të Shtetit, ku shpesh herë e ka quajtur si të korruptuar, apo të njëanshme. Ky detaj është zbuluar nga vetë Meta, teksa u përgjigjej pyetjeve të gjyqtarëve në Gjykatën Kushtetuese. Presidenti Ilir Meta ka publikuar në faqen zyrtare të Presidencës përgjigjet mbi 72 pyetjet që anëtarët e Gjykatës Kushtetuese i drejtuan atij, gjatë shqyrtimit të vendimit të Kuvendit për shkarkimin e kreut të shtetit.
Gjithashtu, a mendoni se akuzat ndaj përfaqësuesve të misioneve diplomatike bërë në daljet tuaja publike në media apo rrjetet zyrtare e sociale si të korruptuar apo ato për rrezikun e integritetit tuaj fizik kanë bazë faktike dhe nëse po, a keni bërë denoncim në organet përkatëse?
“Presidenti i Republikës kurrë nuk ka marrë asnjë shqetësim zyrtar nga asnjë partner ndërkombëtar për sjelljet apo aktet e tij. Presidenti, shqetësimet e tij për sjellje jo korrekte të diplomatëve të caktuar, ua ka shprehur zyrtarisht atyre, duke vënë në dijeni po zyrtarisht edhe vendet apo organizatat që ata përfaqësojnë.
Presidenti i Republikës nuk ka ndërhyrë kurrë në kompetencat e asnjë përfaqësie diplomatike dhe të asnjë vendi partner, por për fat të keq, ka patur diplomatë të caktuar që publikisht kanë vënë në diskutim dekretet e Presidentit, duke marrë hapur anën e mazhorancës në kapjen e sistemit të drejtësisë, e sidomos të Gjykatës Kushtetuese”.
Kujtojmë këtu se një vit më parë, ambasadorja amerikane, Yuri Kim dënoi thirrjet e forta që qytetarët të kapin armët e ftohta në zgjedhjet e 25 prillit. Duke përmendur sfurqet e artikuluara nga presidenti Ilir Meta, Kim shprehej se këto thirrje duhen dënuar. Ndonëse nuk e përmendi kreun e shtetit, mesazhi ishte drejtpërdrejtë për Ilir Metën, pasi ka deklaruar disa herë se “qytetarët do marrin sfurqet, nëse preket vota”.
