Ambasadorja Amerikane Yuri Kim, deklaron se mirëpret zgjatjen e afatit të komisionit parlamentar për inceneratorët. Në një postim në Twitter, Yuri Kim thotë se lufta kundër korrupsionit është prioritet për SHBA-në, ndaj kërkon që afati i punës së komisionit të zgjatet.
“Forcimi i institucioneve demokratike dhe lufta kundër korrupsionit janë prioritetet e SHBA-së në Shqipëri. Mirëpresim zgjatjen e afatit të komisionit parlamentar për inceneratorët. Ne u bëjmë thirrje të gjitha autoriteteve dhe institucioneve përkatëse të shqyrtojnë dhe të ndërmarrin veprimet e duhura. Do ta monitorojmë nga afër. Përgjegjësia është çelësi i demokracisë”, shprehet Yuri Kim në rrjetet sociale.
I nisur me bujë nga PD, zyrtarisht komisioni hetimor për inceneratorët u mbyll më 28 janar pa produkt. Plani i hetimit për inceneratorët, i cili nuk u votua nga mazhoranca socialiste, parashikonte fillimin e hetimeve që në datën 19 janar, dhe ato do përfundonin në 24 shkurt të këtij viti.
PD-ja kishte parashikuar një “mbështetje” nga PS-ja, për zgjatjen e afatit të këtij komisioni nga data e mbarimit 28 janar në 28 shkurt, gjë që nuk ndodhi. Për hetimin e plotë të asaj që opozita e konsideron si afera e inceneratorëve, ajo kërkoi informacion nga mbi 28 institucione shtetërore dhe private, ku pjesa më e madhe kanë kthyer përgjigje. Komisioni kërkoi kontrollin e veprimeve dhe mosveprimeve të organeve publike të përfshira në procedurat për ndërtimin dhe administrimin e impiantit të trajtimit të mbetjeve urbane në Elbasan, Fier dhe Tiranë. Verifikimin e pasojave që secila prej procedurave ka pasur në buxhetin e shtetit në mjedis, mbi konkurrencën dhe tregun e lirë dhe vlerësimin e nevojës për ndërhyrje ligjore me qëllim mbrojtjen e konkurrencës, tregut të lirë, mjedisit dhe përafrimin e legjislacionit me BE-në.
Deputetja demokrate Jorida Tabaku akuzonte socialistët, se ishin kthyer në mburojë për aferën korruptive. Për këtë çështje, deri tani në burg ka përfunduar Lefter Koka.
