Ministria e Drejtësisë do të shkrijë Agjencinë Shtetërore të Kadastrës në Durrës. Në një komunikm për mediat, Ministri i Drejtësisë Ulsi Manja ka komentuar raportin e Transparency International, në lidhje me korrupsionin në vend. Raporti tregonte që Shqipëria kishte zbritur një pikë në renditje. Duke qëndruar në të njëjtën linjë, Manja tha se lufta ndaj korrupsionit është një detyrim ndaj qytetarëve dhe fëmijëve.
“Jemi duke diskutuar raportin e TI. E konsiderojmë mbi punën tonë, por në radhë të parë luftën ndaj korruspionit qoftë si perceptim apo korrupsion real konkret, e kemi detyrim ndaj fëmijëve tanë, qytetarëve tanë për ta bërë një mjedis ku shteti ofron shërbimet publike në mënyrë cilësore. Aty ku futet korrupsioni, kemi cënime të standardit të qytetarëve. Do të kemi një strategji konkrete për luftën ndaj korrupsionit. Lufta ndaj korrupsionit nuk mund të ketë sukses nëse nuk bashkëpunojmë të gjithë së bashku, edhe ju si media. Ju ftoj që gjatë 2022 ju t’ju kem aleatin më të fortë gjatë kësaj lufte”, tha Manja.
Ministri i Drejtësisë, Ulsi Manja, foli për Drejtorinë Antikorrupsion dhe denoncimet e ardhura aty në dy muajt e parë të punës. “Dua të sjell rastet e denoncimit të akteve dhe praktikave korruptive nga Drejtoria Antikorrupsion. Meqenëse sot ka dalë edhe raporti i TI për korrupsionin, kemi filluar ta studiojmë me hollësi dhe seriozitet këtë raport. Është një shtysë më shumë në punën tonë, megjithëse shtysa e parë është shërbimi ndaj vendit dhe qytetarëve shqiptarë. Në dy muajt e parë të punës së Drejtorisë Antikorrupsion që përkon me periudhën nëntor-dhjetor 2021. Janë gjithsej rreth 200 praktika të trajtuara dhe që janë denoncuar në këtë drejtori. Nga këto praktika, 11 kallëzime janë formuluar dhe depozituar në prokurori, ndërsa janë referuar në njësitë përkatëse rreth 48 masa administrative”, tha Manja.
Më tej, ai bëri të ditur se 611 raste kanë ardhur në këtë drejtori vetëm për Kadastrën. “Kemi 611 raste të ardhura në këtë drejtori për pothuajse rreth 20 agjenci të tjera dhe po trajtohen nga kjo agjenci. Është institucioni ku pjesëtarët e drejtorisë antikorrupion mjaftohen të marrin denoncimet dhe aty do të gjejnë në mos të natyrës penale, të natyrës administrative.
Në Durrës, që në fillim të herës kemi çuar si masë për shkarkim nga detyra pothuajse të gjithë drejtorinë.
Nga drejtori i ASHK Durrës, te përgjegjësi i sektorit të legalizimeve, hartografisë e të tjerë specialistë. Janë 215 dosje legalizime objektesh vetëm për periudhën gusht-tetor 2021, ku ka rezultuar se në këto dosje mungonin dokumentacionet më të rëndësishme që kërkon ligji”, u shpreh Manja.
