Po vijon numërimi i votave preferenciale në Tiranë për zgjedhjet e 11 majit, me një interes të lartë për rezultatet në listat e hapura, ku gara mes kandidatëve kryesorë është tepër e ngushtë.
Në Partinë Socialiste, një “luftë” e ashpër po zhvillohet mes Blerina Gjylametit dhe Olta Xhaçkës, të cilat synojnë sigurimin e mandatit përmes votave preferenciale. Po ashtu, një garë tjetër e fortë është mes Xhemal Qefalisë dhe Ornaldo Rakipit, që ndodhen pranë njëri-tjetrit në numër votash.
Edhe në kampin opozitar, në Partinë Demokratike, Jorida Tabaku dhe Ilir Alimehmeti po përballen “kokë më kokë”, duke garuar në listën e hapur, me diferencë të vogël mes tyre.
Deri tani janë numëruar 3.320 nga 42,402 vota të diasporës për qarkun e Tiranës, që përfshijnë edhe votat preferenciale për kandidatët. Procesi i numërimit po vijon dhe pritet që në orët në vijim të ketë rezultate më të qarta për përbërjen përfundimtare të listës fituese.
