Sot ka nisur shembja e banesave në zonën e “5 Majit” në Tiranë. Policia ka rrethuar zonën dhe ka disa persona të shoqëruar. Policia ka ndërhyrë me forcë edhe brenda banesave, duke nxjerrë prej aty disa qytetarë, përfshirë fëmijë. Ndonësë shembja e banesave ishte parashikuar që të niste rreth orës 10:00 të mëngjesit të sotëm, puna në terren ka nisur shumë më herët se orari zyrtar. Ndërhyrja është bërë që në orën 03:00 të mëngjesit, duke ndërprerë fillimisht energjinë elektrike. Sot është parashikuar shembja e 3 banesave, dhe më pas procesi do të vijojë me godina të tjera në ditët në vijim.
Inspektoriati i Mbrojtjes së Territorit të Tiranës, vendosi si afat të fundit ditën e sotme për banorët e “5 majit” që të braktisin banesat e tyre, të cilat do të shemben për t’i hapur rrugë projektit të “Unazës së Madhe”.
Banorët këmbëngulin se projekti i “Unazës së Madhe” është ndryshuar, dhe nuk është bërë publik. Qytetarët kanë kërkuar bisedime me qeverinë dhe Bashkinë, dhe të kompensohen sipas çmimit të tregut për prishjen e banesave të tyre.
