Ish-kryeministri Berisha, gjatë takimit në Shkodër u shpreh se revolucioni është paqësor dhe në 8 janar demokratët donin të nxirrnin banditët nga shtëpia e tyre. Ai paralajmëroi se 8 janari është vetëm fillimi, duke dhënë kështu sinjale të tjera për dhunë. Sipas tij, ata që mbështesin Bashën, do të dështojnë.
Berisha i është drejtuar ndërkombëtarëve, të cilët nuk mund të mos “ndëshkonin” protestën e dhunshme të 8 janarit, duke e ritheksuar se ato janë paqësore dhe nuk do të ndalen. Madje u mundua ta justifikonte dhunën, duke thënë se e vetmja gjë që dëshironin ata ishte të nxirrnin banditët nga shtëpia e demokratëve.
Emrat e njohur demokratë të Shkodrës që janë parë në Pallatin e Sportit krah Berishës kanë qenë Voltana Ademi, Bardh Spahia, Lorenc Luka, Arvid Bushati etj, ndërkohë që nga Tirana kanë mbërritur Edmond Spaho, Belind Këlliçi dhe të tjerë mbështetës.
“Thirrja për partnerët ndërkombëtar, ky është revolucion paqësor por i pandalshëm. Demokratët më 8 janar nuk kërkonin gjë tjetër, por atë që do të bënte një polici e çdo shteti të lirë, të nxirrnin banditët nga shtëpia e tij. Kush është ai që e sheh shtëpinë e tij plot me bandit dhe nuk “lufton” t’i nxjerri? 8 janari është vetëm fillimi, ju jap fjalën. Ata që mbështesin Bashën për të marrë peng pluralizmin, do të dështojnë”, tha ai.
Berisha deklaroi se Bashën e pret vrima e miut nga revolucioni që kanë nisur, dhe se kushdo që e do për kryetar opozite, nuk do lirinë. “Hiqni dorë prej Lulzim bravës, është turpi i dheut dhe turpi i historisë. Ndahuni nga Lulzim Basha, sepse atë e pret vrima e miut nga ky revolucion. Askush nuk ka të drejtë të luajë me pluralizmin politik, ata që mbështesin Bashën për kryetar opozite, ata tallen! Shqiptarët që mbështesin Bashën tallen me lirinë, me vlerat e pluralizmit”, ka thënë ai.
