Gjykata e Shkallës së Parë në Shkodër ka dënuar me 10 vite burg Mark Kodrën, 47-vjeç, i cili më 29 maj të vitit të shkuar qëlloi për vdekje bashkëfshatarin Emiliano Ndou, 25-vjeç. Gjykata vendosi 15 vite burg për të, por duke qënë se ai përfitoi nga gjykimi i shkurtuar, dënimi u ul në 10 vite burg.
Kodra gjatë gjykimit ka pranuar se e ka vrarë Ndoun. Pak para ngjarjes, viktima ka kaluar me motor para shtëpisë së autorit, duke bërë zhurmë, gjë që ka sjellë irritimin e 47-vjeçarit që ka marrë kallashin dhe pas sherrit me 25-vjeçarin, ka qëlluar në drejtim të tij. Pas kësaj, Kodra është futur në banesën e tij duke menduar se plumbat nuk e kishin kapur Ndojin, dhe pasi policia i ka shkuar në shtëpi, fillimisht ai nuk e ka pranuar autorësinë e krimit. Më pas ai ka treguar rrethanat e ngjarjes, ndërsa në dëshminë para uniformave blu mësohet se ka thënë “nuk e durova dot më”.
