Ish-deputeti i Partisë Demokratike, Gnet Strazimiri, ka thënë se mandatet për mbledhjen e Kuvendit Kombëtar do të verifikohen më datë 11 dhjetor. Ai deklaroi se statuti përcakton se në këtë mbledhje, formohet një komision që verifikon mandatet. Sipas Strazimirit, cilido që ka kuriozitet të shohë firmat, mund t’i shohë ato në zyrën e Edi Palokës, i cili është dhe kryetari i Këshillit Kombëtar, organit të dytë më të lartë në PD.
Strazimiri u shpreh në një deklaratë për mediat, se kanë paraqitur për transparencë numrin e firmave që janë mbledhur nga delegatët e PD. Duke qendruar në të njëjtën linjë, ai shtoi se nuk ishte detyrim statutor, por çdo gjë ishte për transparencë.
Ky qëndrim publik vjen në një kohë kur Sekretari i Përgjithshëm, Gazmend Bardhi, ka ngritur dyshime mbi autenticitetin e firmave të 4200 delegatëve që Berisha pretendon se ka mbledhur, me qëllim për mbledhjen e Kuvendit Kombëtar, për të shkarkuar Bashën dhe për të rimarrë vetë drejtimin e partisë. Dyshimet e para për mundësinë e falsifikimit të firmave nisën pasi Sali Berisha, gjatë një konference shtypi ditën e djeshme, e vuri theksin tek ruajtja e identitetit të delegatëve që kanë firmosur, me alibinë e mbrojtjes së të dhënave personale.
“Siç jeni në dijeni, shumica absolute e PD kanë firmosur kërkesën për mbledhjen e Kuvendit më 11 dhjetor. Ky është organi më i lartë statutor që drejton PD. Ajo verifikohet sipas një procedure fikse, standarde.
Vetë Kuvendi miraton komisionin e verifikimit të mandateve. Edhe nëse nuk vetëmblidhet Kuvendi, nuk verifikohet nga askush tjetër, sepse të gjithë janë vartësit e tij.
Si i tillë edhe Kuvendit i datës 11 dhjetor do të verifikohet nga komisioni që do të miratohet në sallë. Kemi paraqitur për transparencë numrin e firmave që janë mbledhur nga delegatët e PD. A ishte detyrim statutor? Jo. E kemi bërë për transparencë.
I kemi dorëzuar në organin e dytë më kryesor të PD, Këshillin Kombëtar. Kush ka kuriozitetin mund të shohë në zyrën e kreut të Këshillit të PD. Kushdo e ka 20 hapa larg zyrën e z. Paloka, e të shohë janë mbledhur apo jo firmat, jo të verifikojë, atë e bën Kuvendi vetë”, tha Strazimiri.
