53-vjeçari Kabuli Hunda i cili akuzohet për përdhunim sistematik nga një 16-vjeçare, me të cilën ka lidhje familjare, ka hedhur poshtë në mënyrë kategorike çfarë është thënë për të. Ai mohon faktin se mes tij dhe minorenes të ketë pasur raport.
Më herët, e ëma e vajzës së abuzuar tha se për katër vite mund të ketë patur raport me 53-vjeçarin. Ai është marrë me forcë mbrëmjen e djeshme në ambientet e Policisë së Gjirokastrës, pasi kërkonte të mësonte se për çfarë do të shoqërohej në polici.
“Nuk janë të vërteta akuzat, nuk dëshiroj të jap asnjë lloj shpjegimi për këtë ngjarje të montuar, por do të shprehem në një moment të dytë”, ka deklaruar Hunda.
Seanca ka vijuar me pauza disa minutëshe, për shkak të gjendjes tepër të rënduar emocionale të 53-vjeçarit, i cili në një moment i ka rënë murit me kokë. Pas refuzimit të dhënies së shpjegimeve të tij, dosja hetimore nuk është dorëzuar ende në organin e akuzës, pasi pritet të plotësohet me dy dëshmi të tjera. Pritet që sot pasdreke ose nesër në mëngjes, dosja t’i dorëzohet prokurorit të çështjes që është i specializuar për rastet e dhunimit të fëmijëve.
