“Evakuimi i shtetasve të Bashkimit Evropian dhe qytetarëve afganë që punojnë me BE, është një përparësi kryesore për bllokun”, tha Shefi i Punëve të Jashtme të BE Josep Borrell në një konferencë shtypi të martën.
“Prioritet është të sigurohet evakuimi – në kushtet më të mira të sigurisë – të shtetasve evropianë ende të pranishëm në vend, si dhe të qytetarëve afganë që punuan me ne për më shumë se 20 vjet, nëse duan të largohen nga vendi”, tha Borrell.
“Situata në terren është shumë fluide dhe po bëhet sigurisht më e rrezikshme për njerëzit që kanë punuar dhe mbështesin punën tonë”, shtoi ai.
Duke folur pas një takimi virtual të ministrave të jashtëm të BE, Borrell theksoi se BE do të bëjë “çdo përpjekje të mundshme”, për të siguruar sigurinë e të gjithë atyre që kanë punuar me BE.
“Ne nuk mund t’i braktisim ato. Ne do të bëjmë – po bëjmë – gjithçka që mundemi në mënyrë që t’i sjellim dhe t’u ofrojmë strehim në vendet anëtare të Bashkimit Evropian”, tha Borrell.
“Bashkimi Evropian gjithashtu do t’i kushtojë vëmendje të veçantë afganëve, siguria e të cilëve tani mund të jetë në rrezik për shkak të angazhimit të tyre parimor për vlerat tona të përbashkëta”, shtoi ai më tej.
Burimi i lajmit: CNN. Përshtatur nga Tirana Today
