Biznesmeni rumun Dragos Savulescu, bashkëshorti i modeles shqiptare Angela Martini, ka rënë në prangat e policisë greke.
Në një artikull të publikuar sot nga “Protothema”, flitet mbi arrestimin e dy personave të cilët bënin një jetë luksoze në Mykonos, duke shpenzuar shifra marramendëse në restorante dhe jahte.
Dragos Savulescu është dënuar me 5.5 vite burg për përfshirjen e tij në një skandal të madh ekonomik në Rumani, dhe përfshin përvetësimin e parave publike.
Ai në fillim të vitit 2019 u arrestua dhe u dënua me 5.5 vite burg për përvetësim, së bashku me ish-kryebashkiakun e Konstancës, Radu Mazăre, Cristi Borcea, ish-president i Dinamos dhe të pandehur të tjerë që u shpallën fajtorë, duke përvetësuar një total prej 114 milionë eurosh. Savulescu, pas vendimit të autoriteteve gjyqësore, u arratis në Itali, konkretisht në Napoli, për t’u prangosur dje në Mykonos nga Rojet Bregdetare, të cilët së bashku me zyrtarët e Nën-Drejtorisë së Policisë së Mykonos, organizuan një operacion të madh për arrestimin e tij.
Dragoș po argëtohej me dy shokë në një restorant të njohur në zonën e Mylës. Ai konsiderohet nga Interpol, një kriminel jashtëzakonisht i rrezikshëm. Urdhri i arrestit për Dragoș Savulescu u lëshua pas një urdhri evropian nga autoritetet rumune për “pjesëmarrje në një organizatë kriminale” dhe për “mashtrim kundër shtetit”. Ai u dërgua te Prokurori i Apelit i Syros, për ekstradim tek autoritetet rumune.
Burimi i lajmit: protothema. Përshtatur nga Tirana Today
