Një ditë më parë, forcat operacionale zhvilluan një aksion antidrogë në zonën “Varri i Bamit”. Operacioni ka ardhur si rezultat i informacioneve të marra në rrugë operative, se në këtë zonë kanë qarkulluar disa persona, të cilët ishin shpërndarës të lëndëve narkotike me doza. Gazetari i News24, Ergys Gjencaj është thirrur në Prokurorinë e Tiranës për të dëshmuar, pasi policia e shtriu në tokë forcërisht sepse po filmonte të gjithë ngjarjen që ndodhi në zonën e “Varrit të Bamit” në Tiranë. Pas daljes nga Prokuroria, gazetari Gjencaj tha se ka dhënë dëshminë e tij, dhe bëri apel që institucionet e drejtësisë të zbardhin ngjarjen.
“U thirra nga ana e Prokurorisë për të dhënë dëshminë time përsa i përket ngjarjes së djeshme. Unë kreva detyrën time, dhash dëshminë time duke treguar të gjithë dinamikën e ngjarjes. Po ashtu dhash edhe dy videot e regjistruara nga aparati im celular, dhe apeloj që institucionet e drejtësisë të hedhin dritë mbi ngjarjen dhe të vendosin drejtësi”, tha Gjençaj.
Prokuroria do marrë në pyetje edhe 5 efektivët e policisë që u përfshinë në këtë incident, hetime ndaj të cilëve po kryen edhe nga SHÇBA.
