Gjykata e Posaçme kundër Korrupsionit dhe Krimit të Organizuar (GJKKO), ka rrëzuar kërkesën e ish-drejtorit të Policisë së Vlorës Jaeld Çela, për lirimin nga burgu.
Çela, i cili është i pandehur bashkë me ish-ministrin e Brendshëm Saimir Tahiri, kërkoi lirinë me argumentin se nga dita e vendimit në Apel ka kaluar afati 1-vjeçar, por gjyqtari Erjon Bani ka vendosur të hedhë poshtë kërkesën e tij.
I vetëdorëzuar në Policinë e Tiranës një vit më parë dhe tashmë në paraburgim, Jaeld Çela kërkoi zbutje të masës së sigurisë, nga “Arrest në burg” që është aktualisht.
Ish-kreu i Policisë së Vlorës akuzohet për veprat penale “Kultivim i bimëve narkotike”, “Trafikim i bimëve narkotike” dhe “Grup i strukturuar kriminal”. Jaeld Çela është dënuar me 3.4 vite burgim për shpërdorim detyre.
Përmes avokatit të tij, Jaeld Çela kërkoi nga Gjykata kundër Korrupsionit dhe Krimit të Organizuar:
1- Pranimin e kërkesës duke vendosur sipas objektit të saj.
2- Konstatimin e shuarjes së afateve të paraburgimit.
3- Zëvendësimin e masës së sigurimit personal nga “Arrest në burg”, në atë “Arrest në shtëpi”, ose në “Detyrim për t’u paraqitur në policinë gjyqësore”.
