Eriselda Sefa është emëruar kryetare e Bashkisë Lushnje me vendim të Këshillit Bashkiak, pas shkarkimit nga detyra të Fatos Tushes, për shkak të arrestimit të tij me urdhër të SPAK për korrupsion me tenderat publikë. Eriselda Sefa është votuar sot gjatë një mbledhje jashtë radhe për zgjedhjen e kryetarit të ri, pas arrestimit të ish-kryetarit Fatos Tushe nga SPAK për korrupsion me tenderin 240 milionë lekësh të kanalit vaditës të dy fshatrave.
Sipas ligjit 139 të vitit 2015 për qeverisjen vendore, i takon njërit prej nënkryetarëve të Bashkisë të marrë postin e kryebashkiakut.
Aktualisht Bashkia Lushnje ka dy nënkryetarë, Gentian Nushin dhe Eriselda Sefan, por Nushi u tërhoq nga gara dhe postin e mori me votim të Këshillit, Eriselda Sefa.
Fatos Tushe u arrestua me urdhër të Prokurorisë së Posaçme. Gjykata la në burg Tushen, i cili akuzohet për korrupsion dhe abuzim me tendera.
Pak ditë më parë, kryeministri Edi Rama përjashtoi ish-kryebashkiakun e Lushnjes Fatos Tushe nga Partia Socialiste, i shkarkuar pas akuzave të SPAK për korrupsion.
Rama u shpreh se shkarkimi dhe përjashtimi i tij janë masa që mund të rishikohen vetëm nëse në fund të procesit, rezulton i pafajshëm nga akuzat e ngritura ndaj tij.
