Presidenti brazilian Jair Bolsonaro, këtë të mërkurë ka përfunduar në spital pasi për një kohë të gjatë nuk ju ndal lemza e vazhdueshme që i shkaktoi dhimbje barku.
Sipas Sekretariatit Special të Brazil për Komunikimin Social, Bolsonaro ndjeu dhimbje barku natën dhe ai po i nënshtrohet testeve në spitalin e Forcave të Armatosura në Brasilia, shkruan BBC.
“Me këshillë mjekësore, presidenti do të vëzhgohet për një periudhë prej 24 deri në 48 orë, jo domosdoshmërisht në spital”, thuhet në komunikim. Sipas mediave në Brazil, Bolsonaro është ankuar për më shumë se një javë nga lemza, duke thënë se kjo po i shkaktonte atij vështirësi kur fliste në publik.
Sipas Bolsonaros, problemi me lemzën kishte nisur pas një operacioni dentar më 3 qershor, për të cilin fajësonte mjekimet që i ishin rekomanduar. Pas dy vitesh e gjysmë në krye të Brazlit, Bolsonaro po përballet me një presion në rritje, në lidhje me menaxhimin e pandemisë në vend.
Në fillim të muajit korrik, dhjetëra mijëra njerëz dolën në rrugë për të protestuar mbi pretendimet e korrupsionit që përfshinin blerjen e vaksinave kundër koronavirusit.
