Mbi 1500 qytetarë të Deçanit kanë kërkuar ndihmë mjekësore, për shkak të helmimit. Mes të helmuarve janë edhe 51 fëmijë, të cilët janë dërguar për trajtim në spital. Kryetari i Komunës së Deçanit, Bashkim Ramosaj, ka komentuar rezultatet e fundit nga IKSHPK, ku rikonfirmon se uji në këtë zonë nuk është kontaminuar.
”Deklarimet e mia si kryetar i komunës, është mirë me u marrë si të mirëqena dhe me u trajtu drejtë. Unë kam kërkuar ditën e hënë nga institucionet kredibile të shtetit, dhe krejt institucionet tjera që merren me sigurinë, që çdo hipotezë, çdo supozim i ngritur në këtë çështje të hetohet deri në fund, ku të kemi edhe argumentet dhe ekspertizën e duhur”, ka thënë ai.
Nga analizat rezulton se uji në Deçan nuk është i infektuar, duke shtuar misterin rreth helmimit masiv. Instituti Kombëtar i Shëndetësisë Publike të Kosovës, bëri me dije se analizat mikrobiologjike të mostrave në rastin e helmimit të banorëve në Komunën e Deçanit, kanë dalë negative.
Sipas konfirmimit të IKSHPK-së, bazuar në rezultatet e fundit, uji nuk është faktor kontaminues që ka ndikuar në helmimin e banorëve të Deçanit.
Edhe analizat fiziko-kimike të mostrave të ujit në gjashtë fshatra kanë rezultuar dy herë negative, dhe sipas standardeve për konsumimin e ujit. Infektologu në Spitalin e Pejës, Halil Komoni, thotë se nuk ka vend për panik me situatën e helmimeve në Deçan.
“Gjërat fillestare flasin për një fatkeqësi elementare natyrore. Bëhet fjalë për një epidemi hidrike, sipas të gjitha gjasave, mirëpo nuk ka hapësirë për panik, por ka hapësirë për ndihmë dhe solidaritet”, tha Komoni.
