Gjykata ka dënuar me 4 vite burg Behar Pemën, i cili në gjendje të dehur aksidentoi makinën ku udhëtonin katër vajza, dy prej të cilave humbën jetën.
Në 13 shtator, në dalje të tunelit të Elbasanit humbën jetën Lusinda Garunja dhe Xheneta Qallia.
Katër vajzat po udhëtonin në tunelin e Elbasanit, kur në dalje të tij u goditën nga pas nga një makinë tip “Benz” që drejtohej nga Behar Pema. Ky i fundit rezultoi i dehur në testin e alkoolit, dhe u arrestua nga uniformat blu.
Nervida Garunja e cila ishte pasagjere në sediljen e përparme, i tha policisë se e kishin parë makinën që i aksidentoi të bënte manovra përgjatë gjithë rrugës deri pak momente para përplasjes tragjike.
Ato po shkonin të festonin 19-vjetorin e lindjes së Lusinda Garunjës, e cila fatkeqësisht ndërroi jetë në ditën e saj të lindjes.
