Të dhënat paraprake të testimeve mbi vaksinën anti-Covid, CureVac, vaksina mRNA që mund të prodhohet dhe rruhet më lehtë nga të tjerat, dhe që shpresohej se mund të shpërndahej në të gjithë botën, nuk kanë dhënë rezultatet e dëshiruara.
Vaksina e CureVac, është vetëm 47 për qind efektive kundër Covid-19, një vlerë që është nën pragun minimal të vendosur nga Organizata Botërore e Shëndetësisë, dhe që mund të rrezikojë miratimin e saj. Po çfarë shkoi keq? Dhe pse vaksinat e Pfizer dhe Moderna, të bazuara gjithashtu tek teknologjia mARN, janë shumë më efikase?
Efekti i varianteve?
Sipas CureVac, kompania farmaceutike gjermane që prodhoi vaksinën, dështimi mund të varet pjesërisht nga variantet e koronavirusit, të cilat janë përhapur në 10 vende midis Evropës dhe Amerikës Latine, dhe në të cilat u zhvilluan studimet e Fazës III (midis këtyre ekziston varianti pak i njohur Lambda, i identifikuar fillimisht Peru).
Vetëm një rast, midis 124 infeksioneve me Covid-19 që ndodhën gjatë testeve i atribuohet në fakt llojit origjinal të SARS-CoV-2. Ndërkohë, vaksinat e tjera mARN ofrojnë një mbrojtje të lartë edhe ndaj varianteve.
Kështu vaksina e Pfizer ka një efikasitet prej 92 për qind përkundrejt infeksioneve nga varianti Alfa (ai britanik), 83 për qind kundër variantit Delta (i identifikuar fillimisht në Indi) dhe 75 për qind kundër variantit Beta (i shfaqur në Afrikën e Jugut). Me pak fjalë, fajin e kanë variantet.
Një ekuilibër i vështirë
Sipas hipotezave të para, të përmbledhura në një artikull të botuar në revistën “Nature”, problemi ka të bëjë me shumë me vetë vaksinën, dhe në veçanti me marrëdhëniet midis dozës dhe përbërjes së vaksinës. Gjatë testeve të Fazës I, ku përcaktohet doza optimale, shkencëtarët nga Spitali Universitar i Tybingenit në Gjermani, e vlerësuan një dozë vaksine midis 2 dhe 20 mikrogramë mARN për secilin injeksion.
Por në dozimin më të lartë, vaksina e CureVac shkaktoi shumë efekte anësore, si dhimbje koke të forta, ethe dhe lodhje. Prandaj u vendos që të ulet dozimi. Në nivelin 12 mikrogramë, vaksina dukej se tolerohej mirë dhe të gjithë pjesëmarrësit në testim zhvilluan antitrupa. Gjithsesi, nivelet e antitrupave neutralizues ishin relativisht të ulëta.
Ato ishin shumë të ngjashme me ato që gjenden tek të shëruarit nga infeksioni natyror, por shumë më të ulëta sesa ato që gjenden tek të vaksinuarit me vaksinën e Pfizer apo Moderna, të cilat në fakt kanë përmbajtje më të larta të mARN.
Sipas ekspertëve, ky moment duhet të ishte një sinjal alarmi për rezultatet që do të pasonin. Por tani pyetja kryesore është:Pse nuk mund të jepet vaksina CureVac në doza më të mëdha si të tjerat, pa shkaktuar efekte anësore të rënda?
Ndryshimet e nevojshme?
Nëse ndalemi dhe analizojmë përbërjen e vaksinës, përgjigjja mund të jetë ose tek molekulat e lipideve (yndyrnat) e përdorura për të mbrojtur mARN, ose tek të njëjtat udhëzime gjenetike për reagimin ndaj proteinës virale që dërgohen tek qelizat tona.
Flluskat e lipideve me të cilat është mbështjellë vaksina e CureVac, janë pothuajse identike me ato të përdorura për Pfizer dhe Moderna. Të gjitha vaksinat e ARN-së i japin trupit udhëzime se si të kodojë proteinën virale, të cilën SARS-CoV-2 e përdor për të hyrë në qelizat e trupit të njeriut.
Kështu qelizat që marrin udhëzime e prodhojnë vetë për një kohë të shkurtër proteinën virale, në mungesë të infeksionit, në mënyrë që sistemi imunitar të mësojë ta njohë atë dhe ta bllokojë atë në rastin e kontakteve të mëvonshme. Por vaksinat e Pfizer dhe Moderna përdorin një ARN të modifikuar.
Një nga blloqet e saj ndërtues (nukleozidet) që përbëjnë molekulën e saj – në këtë rast, uridina zëvendësohet me pseudouridinë – ndryshohet në mënyrë që të pengojë reagimin imunitar të trupit të njeriut dhe ta shpërndajë ARN direkt në qeliza:në të kundërt, udhëzimet gjenetike do të identifikoheshin menjëherë si të huaja.
Ky hap mendohet se anashkalon reagimet inflamatore më të theksuara të trupit. Ndërkohë vaksina e CureVac ndryshon renditjen e shkronjave të ARN-së, duke u përpjekur ta bëjë punën e saj pa u bllokuar nga mbrojtja imunitare.
Mbrojtësit e kësaj teknologjie, kanë argumentuar prej kohësh se ky është sekreti i efikasitetiy e lartë të këtyre vaksinave të gjeneratës së ardhshme. Dhe problemet që ka vaksina e CureVac, mund t’i japin sërish të drejtë.
Në pritje të përgjigjeve
Ekzistojnë edhe shpjegime të tjera të mundshme që nuk janë hedhur poshtë:ndryshime strukturore në rajone, që nuk e kodojnë dot proteinën virale; saktësisht temperatura më e lartë e ruajtjes, e cila mund të ketë përshpejtuar degradimin e ARN. Përgjigjet që do gjejmë do të jenë të rëndësishme jo vetëm për vaksinat anti-Covid, por edhe për vetë teknologjinë mARN dhe për perspektivat e trajtimit që ofron ajo.
Ndërkohë, CureVac po punon, së bashku me kompaninë farmaceutike me qendër në Londër, GlaxoSmithKline, për një tjetër vaksinë anti-Covid me bazë mRNA, e cila tek kafshët është vërejtur se prodhon 10 herë më shumë antitrupa neutralizues.
burimi: https://www.focus.it/scienza/salute/curevac-ragioni-flop-vaccino
Përshtatur për Tirana Today
